Крената рампата кон Русино за камионите на ЈП Комуналец-Гостивар

По три дена блокада, дозволен е пристап до Русино за возилата со смет од ЈП Комуналец-Гостивар. Вечерва околу 22 часот, рампата се крена за првиот камион, кој помина да го истовари ѓубрето на депонијата.

Организаторите на блокадата, Граѓанската иницијатива „Стоп Русино, чист воздух за Гостивар“, информираа дека ќе ги пропуштаат само возилата на гостиварското претпријатие, а забраната за сите останати важи и понатаму. Ваква одлука донеле, откако Општина Гостивар им испратила документ-барање адресиран до Владата и Министерството за екологија за преземање мерки за решевање на проблемот,

во чиј прилог е  барањето на Граѓанската иницијатива за дислокација на Русино.

Граѓаните велат дека остануваат кај рампата се’ до 12 август, кога ќе завршат 10 дена од блокадата. До тогаш очекуваат Комуналец и општината редовно да преземаат мерки за санирање на Русино, да се затрупува ѓубрето, да се изгаснат целосно пожарите и да се постават камери. Во спротивно најавуват блокада и протести и понатаму.

Граѓанската иницијатива се залага за затворање на Русино и изградба на депонија по ЕУ стандарди.