Која е процедурата ако ученик во училиште пројави симптоми на коронавирус

Надлежните ги презентираа протоколите на настава со физичко присуство, во кои се определени правилата за функционирање на оние училишта каде учениците ќе се вратат во клупите.

Што доколку во училиште некој ученик развие симптоми на коронавирус?

Министерот за здравство Венко Филипче објасни дека доколку во училиштето се појави заболен од КОВИД-19 или лице кое имало контакт со лице заболено од КОВИД-19, лицето треба да се изолира во посебна просторија со задолжително носење на заштитна маска/прекривка, а директорот треба да воспостави комуникација со Центарот за јавно здравје за добивање на понатамошни насоки за постапување.

„Ако ученик развие симптоми на КОВИД-19 додека е во училиште, наставникот/стручниот соработник го изолира ученикот во посебна просторија со задолжително носење на заштитна маска/прекривка и веднаш ги известува родителите/старателите, кои во најкраток временски период треба да го земат детето со цел консултација и натамошни активности со матичниот лекар на ученикот. Доколку се потврди дека ученик е заболен од КОВИД – 19, се известува епидемиолошката служба во Центарот за јавно здравје кој итно треба да направи анкета со наставниците и учениците за проценка на степенот на ризик врз основа на контактите кои ги имале“, истакна Филипче.

За преземените активности училиштето доставува извештај до општината, а општината до Министерството за образование и наука.