Во Англија пробни масовни настани без маски и дистанца

Во пресрет на летото, Англија започна проект преку кој се тестираат мерки за заштита од ковид. Земјата креира план за укинување на поголемиот дел од рестрикциите, а пробните масовни настани кои се организираа изминатите денови треба да покажат колку новиот систем на справување со вирусот ќе биде безбеден.

Изминатиот викенд во Ливерпул се одржа дводневен музички фестивал, со околу 5.000 луѓе во публика кои немаа обврска да носат маски и да држат дистанца. Сепак, задолжително за влез беше негативен ПЦР тест, направен во последните 24 часа. На сите присутни им биле земени податоци, за да се следи дали некој од нив ќе се зарази со коронавирус во наредните две недели.

Неколку дена претходно, исто така во Ливерпул се одржа бизнис конференција по ист принцип. Учесниците беа без маски, не држеа растојание и сите на влез приложувале негативен ПЦР.