118 години од загинувањето на Гоце Делчев, 41 година од смртта на Тито

Денешниот датум е врзан за две значајни историски личности од македонското минато. Четврти мај е датум на смртта на револуционерот Гоце Делчев и на креаторот на бивша СФРЈ, Јосип Броз Тито.

Гоце Делчев е еден од најпознатите борци за независна и слободна Македонија, водач на македонското револуционерно движење. Роден е на 4 февруари 1872 година во Кукуш, во семејството на Султана и Никола. Се школувал во гимназијата во Солун и на Воената академија во Софија, од каде бил исклучен поради своите идеи и дејствување. Работел како учител во Штип. Бил член на Централниот комитет на ТМОРО, учесник на Солунскиот конгрес на ВМРО, 1896 и се ангажирал на создавање мрежа на бази, комитети и комитски чети на Организацијата. Неговата најпозната визионерска мисла гласи: Јас го разбирам светот единствено како поле за културен натпревар меѓу народите. Бил убиен од турската војска, на денешен датум, 1903-та година, во селото Баница.

На ист ден, пред 40 години, почина доживотниот претседател на бивша СФРЈ, лидер на КПЈ и маршал – Јосип Броз Тито.За неговиот лик и дело се врзани контроверзи и различни ставови. Додека едни го сметаат за неприкосновен лидер, други го осудуваат поради тоталитарен режим и градењето на култ кон личноста. Од Втората светска војна Тито излегол како легендарен лидер. Паралелно со борбите против окупаторот, единиците под негова команда спровеле комунистичка револуција, во текот и по војната. Го одбил притисокот на Сталин во 1948 година, по што со децении добивал финансиска и воена помош од САД.
Јосип Броз Тито почина на 4-ти мај 1980 година во Клиничкиот центар во Љубљана. Бил погребан четири дена подоцна во Белград во присуство над 200 државни и партиски делегации од 180 земји од светот.