Отворен „Македонски изложбено-трговски дом“ во Москва

Во Москва, Русија денес свечено беше отворен „Македонски изложбено-трговски дом“, центар што ќе придонесе за зголемен пласман на македонските производи на рускиот пазар. Домот е сместен во огромен деловен центар, сопственост на  најголемиот руски агро-кластер „Фуд сити“.

На свеченото отворање присуствуваа бизнисмени од главниот град на Руската Федерација,  челните луѓе  на Московската стопанска комора,  на Евроазискиот деловен сојуз како и делегација од Република Македонија составена од компании кои први ги изложуваат своите производи во Москва. Македонскиот национален павилјон ќе биде целосно во функција на зголемување на пласманот на македонските производи на рускиот пазар и ќе им пружа на компаниите комерцијална, правна, царинска и секаква друга помош.

„Македонско-руската стопанска комора, која веќе 12 години делува  под мотото дека е „мост за  стопанско поврзување на двете земје“, дефинитивно го изгради тој мост. Македонските стопанственици сега преку „Македонскиот трговско-изложбен центар“   прејдоа на рускиот пазар и македонската храна и пијалаци многу полесно ќе може да се најдат на трпезите на руските граѓани“, истакна Дејан Бешлиев, извршен директор на Македонско-рускатата стопанска комора.

Меѓу првите македонски компании кои ги понудија своите производи во Москва има винарии, млекари, фабрики за кондиторски производи и друго.