Дали наставата од први септември ќе почне со физичко присуство под знак прашалник

Министерството за образование и наука соопшти дека интензивно се подготвува за започнување на новата учебна година од 1 септември, во услови на пандемија. Во игра се три сценарија.

„Првото за кое воедно и се залагаме, затоа што е од најдобар интерес на учениците и нема подобра алтернатива е целосно отворање на училиштата и сите ученици да бидат во клупите, согласно сите усвоени протоколи. Второто сценарио предвидува наставата да биде како и во 2020/2021 која што се покажа како успешна и ефективна – дел од учениците да посетуваат настава со физичко присуство под посебни протоколи, а дел да реализираат онлајн-настава и третото сценарио предвидува ротирање на учениците на една недела со физичко присуство во училиштата, за да нема нивно целосно затворање.“, извести МОН.

Кое од трите сценарија ќе се применува ќе зависи од епидемиолошката состојба за што одлука ќе донесе Комисијата за заштита од заразни болести.

МОН дополнително информира дека досега од вкупно 31.447 лица вработени во училиштата, вакцинирани се околу 60% и апелира наставниот и останатиот кадар во училиштата да се вакцинира со цел да го заштитат сопственото, а со тоа и здравјето на најблиските.