Се празнува Денот на Свети Климент Охридски

Денешниот празник е востановен во чест на Свети Климент Охридски Чудотворец, најпознатиот ученик на браќата Кирил и Методиј, голема фигура во христијанството и во просветителството. Свети Климент го создал првиот словенски универзитет – Охридската книжевна школа. Имал голем број ученици коишто ги препишувале книгите со словенски букви за словенскиот народ. Вршел чуда и за време на земниот живот, а се верува дека неговите мошти и во денешно време  пројавуваат исцелителна сила. Покрај црковните и педагошките дејности, Климент развил и богата книжевна дејност. Автор е на многу поучни и похвални слова како похвалата на Кирил Филозоф, похвалата на пророкот Захариј и св. Јован Крстител, за Кирил и Методиј, Јован Крстител, Михаил и Гаврил. Бил и првиот епископ словенски со титула епископ велички. По повод празникот на Св. Климент Охридски, кој исто така е патрон и на Македонската православна црква – Охридска архиепископија, утринава ќе се одржи Света божествена литургија со која ќе чиноначалствува митрополитот повардарски г. Агатангел, во сослужение со митрополитот тетовско-гостиварски, г. Јосиф и епископот антаниски, г. Партениј и бројни свештенослужители на МПЦ-ОА. Денешниот ден е прогласен за неработен ден во државата.