Акции во Гостивар и Тетово за поголем ред во паркирањето

Секторот за внатрешни работи продолжи со континуираните активности за поголем ред и безбедност со паркирањето во Тетово и Гостивар.

Во текот на jaнуари, заклучно со 28 јануари, на гостиварското подрачје вкупниот број на казни за погрешно паркирање изнесува 41. Мерките во најголем број се однесувале на погрешно паркирани возила на неколкуте улици во непосредна близина на плоштадот, информира полицијата.

На тетовското подрачје пак вкупно се преземени 444 мерки со кои биле опфатени исто толку непрописно, односно погрешно паркирани возила, најмногу на улиците „Илинденска“ „Маршал Тито“ и „Борис Кидрич“.

Најголемиот број од санкционираните биле паркирани во таканаречени „двојни редови“ и на недозволени места, со што значително го попречувале нормалното движење на другите учесници во сообраќајот.