Familjet e viktimave të aksidentit të autobusit kërkojnë drejtësi: E vërteta nuk do t’i kthejë ata, por do të japë pak shpresë

Familjet e të vrarëve në aksidentin e autobusit të Durmo Turs-it në trevjetorin e ngjarjes tragjike kanë alarmuar se ende nuk ka një vendim gjyqësor për këtë çështje dhe se procesi po zvarritet pa nevojë. Të thyer nga dhimbja thonë se humbja e tyre është e pakthyeshme, por drejtësi duhet të ketë.

“Së bashku jemi të pikëlluar, së bashku drejtojmë betejën e mbërthyer në labirintet e gjykatës, betejën për të vërtetën dhe drejtësinë. Jemi të vetëdijshëm se e vërteta nuk do të na kthejë të dashurit tanë, por do të japë shpresë se tragjedi të tilla nuk do të ndodhin në të ardhmen. Kemi kaluar 100 seanca gjyqësore, një numër i madh i dëshmitarëve, ekspertëve, profesorëve të dalluar, pa mëdyshje kanë treguar shkaqet dhe pasojat e aksidentit, dhe përveç kësaj, ka një zvarritje shtesë të çështjes, superekspertiza. E kemi thënë njëqind herë se e gjithë kjo është e panevojshme. Dhe tragjedi të tilla përsëriten. Besoni sa do të zgjasë dhe ne nuk e dimë”, tha Sinisha Ristoski nga Gostivari, vëllai i të cilit Dejani humbi jetën në aksident.

Është e pakuptueshme për familjet që pas tre vitesh nuk ka asnjë vendim për rastin.

“Anarki në gjykatë, për tre vjet të mos ketë epilog gjyqësor për një tragjedi të këtill, çfarë të thuhet, a dinë çfarë bëjnë. Një seancë, një seancë tjetër, një seancë e tretë, ne thjesht po rrotullohemi në rreth, drejtësia nuk është ende aty. Dhimbja nuk zëvendësohet me asgjë, por ja të zgjidhet, të thuash ka gjykatë”, tha Xhevat Kamberi, i cili gjithashtu ka humbur një të afërt në familje.

Për aksidentin në afërsi të Laskarcit ku humbën jetën 16 qytetarë, po gjykohet në Gjykatën Penale në Shkup. Gjashtë persona janë akuzuar për vepra të rënda kundër sigurisë së njerëzve dhe pronës në komunikacion. Nga Gjykata Penale para një muaji e gjysmë bënë të ditur se për të kaluar rasti në fazën përfundimtare pritet një superekspertizë e nevojshme për mbylljen e procedurës provuese dhe nxjerrjen e aktgjykimit të shkallës së parë.