Само 5 ковид пациенти на инфективно во Гостивар, стивнува бранот

Се смирува ширењето на коронавирусот на гостиварското подрачје. Изминатите денови дневната бројка на новозаразени е ниска, а значајно се намалени и хоспитализациите. На инфективното одделение во болницата во Гостивар, се лекуваат 5 пациенти.

„Само еден од петте пациенти е на кислородна поддршка, примен е утрово со ниска сатурација 70, а со кислородот потоа на визита, сатурацијата беше 92. Инаку, пациентот е со поголема телесна тежина. Другите пациенти се релативно добри, едниот има хемипареза и тој престојува на инфективно 6-7 дена, веќе е негативен на контролен тест и планираме да биде префрлен на неврологија. Амбулантски е доста намален бројот на пациенти и тие што добиваат позитивен резултат повеќето се со лесна клиничка слика.“, информира раководителот на инфективното одделение д-р Ратко Наумоски.

Оценката е дека бранот полека стивнува, но треба уште малку време за да се потврди со сигурност.

„Ние се надеваме дека бранот поминува, но сепак треба да се види барем уште петнаесетина дена, како ќе се одвиваат работите. Сега за сега е намален и бројот на нови случаи, и прегледи и хоспитализирани“, вели д-р Наумоски.

Бројката на активно болни со ковид на подрачјето на Општините Гостивар, Врапчиште и Маврово Ростуше моментално изнесува 53.