Акција во Гостивар и Тетово: Казнети возачи заради непропуштање пешаци

Полициски службеници на СВР Тетово вчера (12 јануари) од 10 до 14 часот спроведоа акциска контрола на возачите – дали и колку тие ги почитуваат нивните обврски кон пешаците како учесници во сообраќајот. При контролата биле откриени и санкционирани вкупно 22 прекршоци (ТЕ-19 и ГВ-3). Најголемиот број од прекршоците се однесувале на непропуштање на пешаците на обележани премини.

„На возачите-прекршители изготвени им се предвидените поднесоци со парични глоби од 200 и 250 евра во денарска противвредност. Оние кои се санкционирани со глоба од 250 евра ќе се соочат и со времено одземање на возачките дозволи од три месеци до една година.“, извести портпаролот на СВР Тетово, Марјан Јосифоски.

При контролата, исто така, санкционирани се и 17 други видови сообраќајни прекршоци.
Секторот за внатрешни работи Тетово повторно со совет и укажување до возачите – секогаш да им даваат предност на пешаците и пред се ако се движат на оние патишта и улици на кои нема обликувани тротоари. До пешаците, пак, се апелира да не ги преминуваат улиците каде ќе стигнат и прописно и безбедно да се движат во сообраќаjот.