Албанскиот фудбалски ас Лорик Цана во посета на Општина Гостивар

Познатиот албански фудбалер Лорик Цана денес беше во посета на Општина Гостивар и се сретна со градоначалникот Арбен Таравари. На средбата разговараа за актуелните состојби во спортот во Гостивар, работата и функционирањето на клубовите, како и за можноста од соработка за натамошни спортски проекти со Фондацијата на фудбалерот.

„Чест ни е што сме домаќини на едно така големо име од светот на фудбалот. Лорик Цана е првата асоцијација, кога ќе се спомене албанската фудбалска репрезентација. Поразговаравме околу работата на Фудбалската академија што ја имаме во Гостивар и можноста за соработка во иднина“, рече градоначалникот.

Фондацијата на Цана спроведува програма преку која младите се стимулираат да се занимаваат со спорт и спортски активности.

„По Скопје и Гостивар ќе се приклучи во нашиот проект и заедно со општината ќе преземеме активности за уредување на спортска инфраструктура со цел што помасовно бавење со спорт и промовирање на здрав живот“, рече Цана.

Триесет и шест годишнот Лорик Цана во својата кариера настапувал за екипите на Пари Сен Жермен, Олимпик Марсеј, Сандерленд, Галатасарај, Лацио и Нант, а со своите 93 настапи во националниот дрес, важи за фудбалер со најмногу настапи за албанската репрезентација.