Апел: Земјоделците да не палат отпад, меѓи и стрништа

Во поширокото гостиварско подрачје, со затоплувањето на времето започнаа подготовките на нивите за пролетната сеидба и земјоделците работат на чистење на отпадот, меѓите и стрништата.

За да се избегнат несакани последици, Секторот за внатрешни работи Тетово  апелира граѓаните да бидат максимално внимателни кога се движат или работат во полето и низ шумите: да не ги палат отпадоците, меѓите и стрништата на нивите и да не фрлаат неизгаснати догорчиња и отпушоци.

„Покрај ова, на оние кои во наредниот период ќе престојуваат на излетничките места во регионот, им се укажува да се воздржат од палење огнови, кои неизгаснати брзо можат да пламнат и да се прошират наоколу, а со тоа да предизвикаат и  материјални и други последици од поголеми размери“, предупредуваат надлежните.

Полицијата најавува превентивни, но и засилени контролни активности. Казните за предизвикување пожари се ригорозни, и предвидуваат затвор од 6 месеци до 8 години, зависно од видот на пожарот и околностите и последиците.