„Атласот на тајните“ нова книга под авторски потпис на гостиварецот Дејан Крстески

Деновиве од печат излезе романот „Атласот на тајните“, петто книжевно дело на авторот Дејан Крстески. Се работи за возбудлив психолошки роман на околу 330 страници, со неочекуван пресврт во крајот.

За новата книга, писателот вели: – „Атласот на тајните“ е сложен роман, односно за роман во роман, книга во книга… кои наизменично го градат стеблото на приказната. И двете целини ги напишав во различен манир, а она што ги обединува е секако длабоката анализа на ликовите која за мене како автор беше од опсесивен интерес. Во однос на приказната нема да откривам ништо, бидејќи не би сакал да влијаам врз сујективното доживување на секој што ќе ја прочита оваа книга. Јас често велам дека станува збор за психолошки роман, но несомнено во него се забележува една еластачност на жанровите кои се обединети. Истовремено сум среќен и возбуден затоа што овој роман ќе се најде наскоро во рацете на читателите. Не само поради тоа што е работен долго време, туку и затоа што нудам една поинаква приказна, поинаква реалност која ќе ги отвори вратите кон подоброто себеспознавање.

Во рецензијата за романот, поетесата и новинар Љупка Антеска меѓу другото наведува: „Додека го читате „Атласот на тајните“ на моменти ќе ве полазат морници од сознанието што сè може да се најде во човековата душа и колку е таа безгранично сложена. Ќе ве натера да погледнете и во самите себе си, а веројатно пошироко да ги отворите очите и за оние околу вас. Но, многу е важно што ова е роман кој раскажува за човекот, на едноставен начин успева да го раслои, да посочи кон мрачните страни од кои секој поединец бега, а истовремено не е роман кој суди и вперува прст.“

Најновото дело на Крстески наскоро ќе биде промовирано во Гостивар.

Дејан Крстески е роден во Скопје, 1986 година. Дипломирал македонски јазик и книжевност на филолошкиот факултет и психологија на филозофскиот факултет на Универзитетот „Св. Кирил и Методиј“ во Скопје. Автор е на збирките раскази „Поглед кон небото“ и „Чист хероин“, и на стихозбирките Луѓе без лица“ и „Херои од хартија“. Добитник е на повеќе литературни награди и признанија, меѓу кои и првата награда на интернационалниот поетски фестивал „Мелнички вечери на поезијата 2020“.