Бегал од полицијата и искршил рампа на гостиварската патарина

Триесет и едногодишно лице од скопски Сарај бегајќи од полицијата искршил една од рампите на наплатната станица Гостивар.

Според податоците од СВР, настанот се случил вчеравечер околу 21 часот и 30 минути. Автомобил „Опел вектра“ со скопски регистерски таблици, што го управувал лицето од Сарај, не застанало на знак „стоп“ даден од службеници на Полициската станица Гостивар и со голема брзина продолжило да се движи, ја скршило рампата број 4, упатувајќи се прво кон Тетово, а потоа кон Скопје.

Во близина на Групчин, возилото е запрено, а возачот приведен. Возилото комплетно е прегледано, но не се пронајдени предмети кои потекнувале од кривични дела или за вршење на такви дела, информира полицијата. По разговор, лицето било пуштено, а ќе се соочи со пријава.