Буџет на Гостивар за 2021: Повеќе пари за капитални инвестиции, канализации, зафати во училиштата

Буџетот на Општина Гостивар за следната година е проектиран на една милијарда и 120 милиони денари, односно околу 18,2 милиони евра. Споредено со годинава, се бележи зголемување од 4,5%. Најголемиот дел од консолидираниот буџет, околу 60% отпаѓа на дотации, кои се трансфери од неколку Министерства за плати на вработените во училиштата, градинките и противпожарната служба.

Општината за наредната година испланирала повеќе пари за капитални инвестиции како и за изградба на канализации.

„Како карактеристика треба да се нагласи дека предвидено е зголемување на средствата за капитални инвестиции и тоа за 38% повеќе од буџетот за годинава, или во сума 500 илјади денари повеќе. Вкупно за капитални инвестиции во 2021-ва се планирани над 145 милиони денари. Исто така, зголемување има на планираните средства за пречистување на отпадни води, конкретно изградба и реконструкција на канализации, и во тој дел имаме 200% зголемување. Поконкретно од 8 милиони денари, колку што биле годинава на 25 милиони денари. Зголемување има и во капиталните инвестиции во образованието и тоа од 10 на 22 милиони денари. Исто така и во делот на заштита на животната средина покачување од од 1,3 милиони денари на на 2,7. Во предлог-буџетот за наредната година, има и нова програма за Младинскиот совет, за која се предвидени 1,2 милиони денари и во тие рамки треба да се реализираат над десет проекти од различни области: култура, спорт и слично“, вели Газменд Исмаили, раководител на Сектор за буџет и финасии.
Исмаили нагласи дека планирано е 33% од основниот буџет да се одвојат за капитални инвестиции, што е значајно, со оглед дека основниот буџет се средствата кои општината ги обезбедува од сопствени извори.

Предлог-буџетот на Гостивар треба да се најде на гласање пред Советот кон крајот на месецот. Во четврток напладне, општината на онјалн платформата зум организира јавна дебата на која граѓаните може да дадат предлози и мислења за буџетското планирање. Линкот за учество на зум дебатата претходно ќе биде објавен на веб страницата на општината.