Четириесетина жени биле жртви на семејно насилство лани во Гостивар

Службите во Центарот за социјална работа во Гостивар, годишно регистрираат по 40 до 60 случаи на семејно насилство. Нивното искуство покажува дека најчесто жртви се жените и дека семејното насилство не е врзано со социјалниот и материјалниот статус. Малтретирањето е присутно во сиромашни и во богати домови, а насилници биле необразовани, но и лица со дипломи и на функции.

„Семејното насилство не бира, исто како и зависностите, алкохолот, дрогата. Значи, го има и кај материјално ситуирани и во сиромашни семејства.“, потврдува социјалниот работник, Ратко Тримчески. Тој додава дека Македонија има модерни законски одредби кои ја третираат проблематиката на семејно насилство, но, во пракса се покажало дека постоечките центри за згрижување на жртвите немаат доволно капацитет и не ги задоволуваат потребите. Така жртвите, доколку решат да побегнат од насилникот најчесто се оставени сами на себе.

Минатата година, тимот во Центарот за социјални грижи во Гостивар работел на 39 предмети за семејно насилство. На почетокот на оваа година, на поширокото гостиварско подрачје беа регистрирани зачестени случаи на малтретирања на жени.