Централна прослава на големиот јубилеј – 1.000 години Бигорски Манастир

Македонското светилиште, манастирот „Свети Јован Бигорски“ денес ја одржува централната прослава по повод јубилејот 1.000 години постоење, која започна со Божествена Архиерејска Литургија со која чиноначалствуваше Архиепископот на МПЦ, г.г Стефан.

Во продолжение ќе следува доделување на ордени и благодарници на поединци и организации, кои дале значителен придонес за Бигорски и за неговата евангелско-просветна мисија.

На централното одбележување, вчеравечер му претходеше вечерна празнична богослужба, со која чиноначалствуваше Митрополитот Дебарско-кичевски, г. Тимотеј, во сослужение со игуменот на Манастирот „Свети Наум Охридски“, Архимандрит г. Нектариј, украсена со благодарственото слово на игуменот, Епископот Антаниски г. Партениј, во кое го истакна значението на Бигорското илјадалетие:

„Илјадагодишното наследство во коешто се слева текот на богослужбениот и аскетско-исихастичкиот живот, го направиле ова место плодотворна почва за обожение, Едемска градина за духовно наситување и за успокојување, прибежиште на душите изморени и обременети од гревот и светот. Во текот на десетте изминати столетија, Бигорски заблескал подобно на Горнатата одаја во Ерусалим, и во него секојдневно се слуша шумот на Педесетницата; оваа благословена падина на Бистра се открила како нова Таворска Гора, каде што преку зраците на Таворската светлина се преобразиле и осветиле многу души; реката Радика, пак, се покажала како некој нов Јордан, каде што непрестајно одекнува Претечевиот повик за покајание: Покајте се, зашто се приближи Царството Небесно, повик којшто силно одекнувал во нејзината клисура со векови, и оттаму се ширел како ехо низ нашите градови и села.“