ЦУК: Во полошко зголемено ниво на водотеците, но засега без опасност од излевање

Според информациите добиени од Регионалните центри за управување со кризи, засега состојбата со водотеците е стабилна и не се регистрирани посебни зголемувања на истите, како и излевања, соопшти Центарот за управување со кризи.

„Во регионот што го покрива РЦУК Тетово (Тетово и Гостивар), до нема пријава за поплавени објекти или излевање на реки и речни потоци, додека нивото на водотеците е подигнато, но засега нема опасност од излевање.
Во текот на вчерашниот ден во Тетово се бележи поголем дефект на водоводната мрежа, за што од страна на ЈП „Водовод и канализација“ – Тетово се преземени мерки и дефектот е отстранет во ноќните часови.
Пријавени се помали дефекти во снабдувањето со електрична енергија во Мавровскиот регион. Врнежите од дожд засега се со слаб интензитет.“, стои во известувањето на ЦУК.

Податоци од УХМР за наврнат воден талог за 24 часа, до 8 часот (во л/м2):
59 Демир Капија; 54 Скопје – Петровец; 50 Охрид; 41 Пожаране; 37 Прилеп; 33 Битола, Штип; 31 Скопје – Зајчев Рид; 29 Ѓуриште; 27 Тополчани, Крушево; 26 Крива Паланка; 25 Тетово, Претор; 24 Куманово; 22 Дебар; 15 Дојран; 11 Виница; 10 Гевгелија; 9 Струмица; 4 Берово.

Времето денес ќе биде претежно облачно со чести врнежи од дожд. Попладне локално ќе има развој на нестабилна облачност со пороен дожд, грмежи и засилен ветер, а можна е и изолирана појава на град. Во текот на денешниот ден, како и во текот на ноќта повторно се очекува да наврне поголема количина на воден талог, на места над 35 л/м2.