Деца изложени на опасност – Стоп за детскиот труд и поголема безбедност за младите работници

Светскиот ден за безбедност на работа, 28-ми април годинава е посветен на младите работници и децата чиј труд се искористува за профит.

„Од вкупно 541 милиони млади работници во светот на возраст од 15-24 години, 37 милиони се деца кои работат на опасни работни места и сочинуваат повеќе од 15,0% од светската работна сила. Многу фактори можат да ја зголемат младинската ранливост на ризиците кои произлегуваат од работната средина, како што се нивната физички и психолошки степен на развој, недостаток на работно искуство, недостаток на обука, ограничена свест за опасностите поврзани со работата и недостаток на моќ за договарање што може да доведе до тоа младите работници да прифатат опасни задачи или работни места со лоши работни услови“, стои во извештајот на Институтот за јавно здравје на Македонија, објавен по повод 28-ми април.

Кампањата за одбележување на Светскиот ден за безбедност и здравје на работа оваа година  има за цел да ги поттикне професионалците ангажирани во оваа област да ги идентификуваат сите ризици на кои се изложени младите работници  и да поттикнат кон донесување на политики за заштита на нивното здравје и за целосна елиминација на сите форми на детски труд.