НБРМ објаснува што со книжните 10-ки и 50-ки после 15 мај

Народна Банка на Македонија денес излезе со соопштение во кое има објаснувања на неколку прашања врзани со официјалното пуштање во оптек на новите полимерни банкноти од 10 и 50 денари, на 15 мај.

„Од денот на влегувањето во оптек на полимерните банкноти, книжните веќе нема да бидат законско средство за плаќање. Но, доколку ги поседувате и на 15 мај, нив ќе можете бесплатно да ги замените за други банкноти или ковани пари во еквивалентен износ. При замената не мора да добиете исклучиво полимерни банкноти, туку може да добиете и ковани пари или, пак, книжни банкноти со апоенска вредност поголема од 50 денари доколку вкупниот износ на вашите книжни банкноти е најмалку 100 денари. Од 15 мај годинава до 15 мај следната година, ќе можете да ја извршите замената во деловните банки во Република Македонија. Доколку и по 15 мај следната година поседувате книжни банкноти во апоенска вредност од 10 или 50 денари, ќе можете да ја извршите замената исклучиво во Народната банка на Република Македонија.“, информира НБРМ.

Кованите пари од 10 и 50 денари и натаму остануваат законско средство за плаќање. Со полимерните банкноти ќе може да се вршат готовински плаќања преку автоматите за наплата, откако фирмите коишто ги инсталираат овие автомати ќе ги приспособат нивните софтвери за да ги препознаваат карактеристиките и заштитните елементи на полимерните банкноти во апоенска вредност од 10 и 50 денари.