До Нова година нема поскапување на струјата, за понатаму е неизвесно

„Во однос на цената на електричната енергија едно е сигурно, поскапување нема да има до крајот на годината. За да има претстава јавноста како драстично се менуваат состојбите: по најавата на Путин минатата недела, дека ќе ја зголеми испоракта на природен гас преку Украина, цената на електричната енергија на берзата во ХУПЕКС се намали за околу 20 проценти. Во овој момент ЕСМ заедно со Владата преземаат активности за да се обезбеди јаглен, со цел да се стабилизира цената на електричната енерија и таа помош пред се ќе се однесува на стопанството и соодветно на капацитетот ќе биде распределена на најправеден начин до сите останати потрошувачи на слободниот пазар. Премногу е рано да зборуваме што ќе биде од први јануари, бидејќи работите се менуваат како на филмска лента, во текот на декември ќе имаме поконкретни информации“, изјави денес претседателот на Регулаторната комисија за енергетика, Марко Бислимоски.

Тој додаде дека проблемот со цените на електричната енергија и природниот гас ги имаат сите земји Европа: „Во наредниот период што следи може да се очекува дека одредени држави пред се своето домашно производство ќе го користат за свои потреби, но повторно ќе има трансакции на пазарот на електрична енергија и тоа ќе функционира. Инаку, во делот на природниот гас, пак, кога ќе се зголеми испораката на природниот гас од Русија, горе доле ќе се стабилизира цената со природниот гас, а со тоа ќе се стабилизира и цената со електрична енергија. Ова не е проблем само во нашата земја, во однос на цените со електричната енергија и природниот гас, туку во цела Европа и веќе и европската комисија и нашата Влада преземаат соодветни мерки со цел да се стабилизира ситуацијата со цените.“