Донации во кревети, УВ стерилизатор, ќебиња и постелнина за болницата во Гостивар

Пандемијата со Ковид 19 ги поттикнува компаниите и организациите да се вклучат во борбата против вирусот преку најразлични хуманитарни активности. Изминатиот период општата болница „Д-р Ферид Мурад“ доби голем број на донации во средства за дезинфекција, заштитна опрема и друго, а денешниот ден ќе се памети по три донации од различни донатори, кои решија да ја помогнат и поддржат установата.

Болницата доби 10 современи болнички кревети, УВ стерилизатор, како и ќебиња и комплет постелнини.

„Денес беше ден на донации за нашата болница. Фирмата „Магам инг“ донираше 10 најсовремени кревети за болницата и 950 хидро дезинфекциони средства. Хуманитарната организација „Дора“ во соработка со фирмата „Кипер“ донираше 300 парчиња ќебиња и комплет постелнини, додека Меѓународниот центар за мир и толеранција со посредство на професорот Фадил Зендели донираше стерилизатор кој работи со УВ зраци, врши стерилизација на сите вируси и бактерии и има капацитет од 65 квадратни метри за 15 минути. Нашите согледувања кажуваат дека стерилизира и коронавирус.“, информираше директорот на болницата Јакуп Јакупи, кој додаде дека донациите се добредојдени и веќе се ставаат на располагање на службите и пациентите.