Две возила удриле во полицаецот кој загина кај тумчевишка клучка

Увидот на местото на несреќата кај тумчевишка клучка, во којашто вчеравечер загина полицаец, траеше до доцна ноќеска.

Несреќата се случи околу 19 часот, Тетово-Гостивар. Според најновите информации од МВР, патничко моторно возило „форд фокус“ со кичевски регистарски ознаки, управувано од 31 годишниот Р.Ш. од Грашница, кичевско удрило во двајца полициски службеници П.Ѓ. и Ф.Ш. додека извршувале работни задачи-обезбедување на место на настанот од претходно случена сообраќајна незгода. Потоа, патничко моторно возило„фолксваген голф“ со тетовски регистарски ознаки управувано од 39 годишниот И.Б. од село Синичане, кое се движело во правец Гостивар-Тетово удрило во полицискиот службеник П.Ѓ.

По несреќата, со возило на итна медицинска помош полициските службеници се пренесени во Медицински центар Гостивар, каде од доктор кај П.Ѓ. е констатирана смрт. Кај Ф.Ш се констатирани тешки телесни повреди и по пружената медицинска помош, неговата здравствена состојба е стабилна.

Р.Ш., по насока на јавен обвинител е лишен од слобода во Полициска станица Гостивар.