Единаесет години од смртта на Тоше Проески

На денешен датум, пред 11 години Македонија ја загуби најсветлата ѕвезда на музичкото небо, Тоше Проески. Човек кој освен по својот ангелски глас, останува запаметен по неговата добрина, хуманост и скромност.

Тоше трагично настрада во 26-тата година од животот, во сообраќајна несреќа на автопатот Загреб – Липовац, во Хрватска.

Тоше Проески ја започнува својата музичка кариера на фестивалот “Мелфест” во 1997 година. Истата година учествува и на “Макфест” со композицијата “Пушти ме”, по што имаше два големи хита Усни на усни и Сонце во твоите руси коси. Во 1999 година го издава својот деби-албум “Некаде во ноќта”. За кратко време стана миленик на сите генерации не само во нашата земја, туку и низ целиот Балкан. Соработувал со композитори и музичари од Балканот и светот како Џеф Бек, Григор Копров, Жељко Јоксимовиќ, Леонтина Вукомановиќ, Марина Туцаковиќ, Бора Ѓорѓевиќ, Миро Буљан, Антонија Шола, Тони Цетински и Ања Рупел.