Еко акција во паркот и околу болницата во Гостивар-Да направиме добро дело!

Група граѓани од Гостивар ова саботно претпладне го посветија на еколошка активност за чистење на отпадоци, расфрлани во зеленило од несовесни поединци. Акцијата ја спроведоа во делови од градскиот парк и округот кај општата болница.

Настанот во Гостивар го организираа Асоцијацијата за демократска иницијатива (АДИ) и Планинарското друштво Шари, во рамки на одбележувањето на Денот на добри дела, глобално движење кое обединува над 110 земји ширум светот во правење различни добри дела.

„Акциите со добри дела може да бидат различни, од чистење, уредување на јавни површини, посета на стари лица, донирање на храна за загрозени лица и сл. Ние се одлучивме да иницираме акција за чистење поради очигледниот проблем со многу диви депонии и ѓубришта. Целиме да се зголеми свеста кај граѓаните за здрава и чиста животна средина. Вклучувањето на граѓаните и младите во вакви акции оди тешко, но ние го правиме она што е наша мисија, дефинитивно е потребен активизам, поголемо учество во животот во заедницата. Се надеваме дека со почести вакви акции ќе се зголемува и интересот кај младите и генерално кај граѓаните за учество“, рекоа од АДИ.

Од Планинарското друштво Шари порачаа дека јавните површини треба сите да ги чуваат, отпадоците да се фрлаат во корпите наменети за тоа, природата да се сака и почитува како најголемо богатство и граѓаните во што поголем број да поддржуваат еко активности.

Вреди да се спомене дека најмладиот учесник во денешната акција Андреј Јаќимоски има само 9 години, и е пример како треба да се градат еколошки вредности.

Македонија, на иницијатива на повеќе граѓански организации, годинава за прв пат се вклучува во одбележувањето на Денот на добри дела. На денот на добрите дела, од жителите се очекува да направат добро за доброто на другите и на планетата, применувајќи ја едноставната идеја дека секој човек може да направи добро дело, било да е големо или мало, за да ги подобри животите на другите и позитивно да влијае на светот.