Филипче: Владата донесе одлука да не работат училиштата и градинките следните 14 дена

Училиштата, градинките и факултетите нема да работат во наредните 14 дена, како заштита од ширење на коронавирус. Министерот за здравство Венко Филипче на прес конференција, информира дека Владата ја донела оваа одлука на денешната седница, односно го прифатила предлогот на Комисијата за заштита од заразни болести.

Сите масовни собири со над 1.000 лица се забрануваат, а спортските настани ќе се одржуваат без публика.

Во врска со состојбата на заболените министерот соопшти: „Тројцата новозаболените се сместени на Клиниката за инфективни болести, каде се и останатите пациенти. Сите пациенти имаат лесна клиничка слика, а првата пациентка е целосно стабилизирана. Очекуваме резултати од контролен тест, првиот направен беше негативен. Се тестира уште една пациентка, се работи за 16 годишна пациентка со неспецифични знаци на респираторна болест.“