Фолклор и рецитации на „Илинденска вечер“ во Гостивар

Државниот празник Илинден, во Гостивар се прослави со пригодна манифестација, која се одржа вчеравечер во Центарот за култура АСНОМ. Празнувањето беше во духот на традиционалните македонски културни вредности, со фолклор и драматизација на стихови и текстови од познати писателски пера, кои зборуваат за историјата и судбината на Македонија.

Во музичкиот дел од програмата настапија: играорците во придружба на оркестарот на културно-уметничкото друштво „Браќа Ѓиновски“, младата гостиварка Кристина Јовановска и вокално-инструменталниот состав на традиционална македонска музика предводен од етномузикологот Сашо Митев.

Со рецитирање стихови посветени на Македонија, се претставија средношколките Емилија Србиноска и Емилија Данилоска. Во драмскиот рецитал учествуваа Ѓорѓи Нешкоски, кој ја подготви и режијата, Вјолца Бафтиу Зулбеари и Теодора Волческа.

„Илинденска вечер“ во Гостивар ја организираше Центарот за култура со поддршка на Министерството за култура.