(Фотогалерија) Празник на кошарката во Скопје – МЗТ го пречека Партизан 74-92

МЗТ Скопје после 4 години се врати во АБА лигата, и со тоа беше јасно дека во СЦ Јане Сандански ќе гостуваат најдобрите кошаркарски екипи од регионот, распоредот сакаше „штрковите“ во првиот домашен натпревар во ова натпреварување да отворат со белградски Партизан, предводен од најтрофејниот европски тренер Жељко Обрадовиќ.

Атрактивното меѓународно натпреварување, и звучните кошаркарски имиња придонесоа после подолго време да бидеме сведоци на полна сала, врвна кошарка и топ-атмосфера, како и заслужуваат љубителите на кошарката од земјава.

Актуелниот македонски шампион МЗТ Скопје Аеродром загуби пред своите гледачи од Партизан со 74-92 во рамки на 2. коло во регионалната кошаркарска АБА лига. Партизан ја оправда фаворитската улога, а клучната предност на патот до победата ја стекна веќе по првата четвртина која ја реши во своја корист со 25-9.

Најефикасен на натпреварот беше Страхиња Мицовиќ од МЗТ СКопје со 18 поени, а новото американско засилување во тимот од Аеродром, Мајкл Кафи, постигна поен помалку. Данте Ексум и Џејмс Нунели беа најефикасни кај победниците со по 17 поени. Јам Мадар постигна 12 поени.

За кошаркарите на МЗТ Скопје ова беше прв натпревар на домашен терен по пауза од четири години, а втор пораз сезонава во регионалната лига.

Следен противник на македонскиот шампион и повратник во регионалното кошаркарско натпреварување ќе биде црногорскиот првак Будуќност.