Голема контрола на СВР Тетово за брзо возење со над 90 казни и одземени возачки

Секторот за внатрешни работи Тетово, вчера (20-ти јули) од 12 до 18 часот спроведе акциска контрола за санкционирање на возачите кои управуваат возила со брзина поголема од пропишаната.

При контролата биле откриени и санкционирани вкупно 70 пречекорувања на максимално дозволената брзина надвор од населено место (Тетово-58 и Гостивар-12). Пет од пречекорувањата биле за повеќе од 70 километри на час над дозволеното, а 26 биле за 50 до 70 километри на час. Покрај ова, санкционирани се и 22 прекршоци за движење на возила со поголема брзина од пропишаната во населено место.

На возачите-прекршители изготвени им се поднесоци по Законот за безбедност на сообраќајот на патиштата и тие ќе се соочат со парични глоби кои, зависно од големината на пречекорувањето, се движат од 45 до 400 евра во денарска противвредност.

Оние кои биле значително пребрзи ги очекува и мерка времено одземање на нивните возачки дозволи од три месеци до една година.