Гостивар „плаче“ за нова градинка – капацитетот надминат, над 100 деца останаа незапишани

Родителите во Гостивар покажуваат огромен интерес да ги запишат своите деца во јавните  градинки. И покрај тоа што е надминат капацитетот на објектите, не може  да се примат сите дечиња. Оваа година, од 312 деца за кои родителите по прв пат конкурирале, биле примени 200. За останатите нема место.

„Како и претходните, така и оваа година интересот е многу голем. При уписот гледавме да бидеме реални, непристрасни, секој родител кога доаѓаше да поднесе барање, се запишуваше датум и така се формираше листата на чекање. Најмногу проблем се создава со децата родени во 2012 година каде реално е преполно, со по 36 деца во една група и навистина не можеме дополнително да згрижуваме други деца“, објасни Наташа Саздовска, директор на Јавната установа „Детска радост“ , во чии рамки функционираат детските градинки во Гостивар.

Бројка на дечиња пак запишани од лани, кои продолжуваат со градинка и годинава е 518. Со новите 200 вкупно достигнуваат до 718 деца во трите јавни детски градинки: Пролет, Цветови и Пчелка.

Повеќе од очигледно е дека на Гостивар му е потребна уште една градинка за да може да се задоволат потребите и барањата на родителите. За сега се` уште е неофицијално, но има најави дека во иднина е планирано отворање на нова градинка со капацитет од 250 деца.