Гостиварец докторант на Универзитетот во Чикаго со проект за учениците во Гостивар

Преку проект што ќе се спроведе во основните и средни училишта во Гостивар, ќе се анализираат мислењата и ставовите на учениците врзани со образованието и меѓусебните односи што тие ги градат. Нивните одговори потоа ќе послужат во насока на активности за подобрување и развој на состојбите со образованието на подрачјето.

Иницијативата и реализацијата на истражувањето „Создавање пријателства и влијанието на пријателството во образованието во Гостивар“ е на гостиварецот Предраг Пандилоски, кој е докторант на Универзитетот Чикаго во Америка, а денес беше во Општина Гостивар каде се потпиша меморандум за соработка.

„Целта на проектот е да се испита како учениците создаваат пријателства, кои се нивните ставови и перспективи во образованието и како нивните меѓусебни реалции влијаат врз овие ставови. Од наредната недела почнуваме анкети во училиштата, и затоа ги охрабрувам сите ученици постари од петто одделение да ги пополнат овие анкети, кои ќе бидат достапни во нивните училишта преку QR кодови и линкови. Како стимул, ќе наградиме 50 ученици симболично со по 500 денари. Во јуни планираме да доставиме извештај со сумираните резултати и предлози со наредни чекори до општината“, истакна Пандилоски.

Општина Гостивар во проектот ќе учествува со логистичка поддршка.

„Сметам дека ова е добар проект за нашата општина, би добиле ставови од учениците за нивните релации и перцепции за образованието во нашиот град. Се надевам дека на крај ќе имаме корисни резултати кои ќе ни дадат насоки како ние како општината понатаму да направиме евентуално подобра стратегија за развој на образованието. Општината  проектот го поддржува логистички, а сите средства се обезбедени од Предраг и неговата екипа, на кои им се заблагодарувам.“, изјави градоначалникот Арбен Таравари.

Се очекува проектот да има и следна фаза, која би се спровела од наесен.