Гостиварецот Владо Глигоровски со „Аманет ви оставам“ настапи на јубилејниот „Гоце Фест“

Познатиот пејач на македонска народна песна Владо Глигоровски од Гостивар беше дел од 35 годишнното јубилејно издание на фестивалот на новосоздадени патриотски и родољубиви песни „Гоце фест“, што се одржа вп петокот (15 март) во Дом на културата во Скопје. Глигоровски настапи со песната „Аманет ви оставам“  за која музиката ја создадоа Златко Мерклер и Драган Матески, кој воедно е и автор на текстот, додека аранжманот го направи Саше Митковски.

Публиката го награди Глигоровски со аплауз и букети, а од организаторите пејачот доби плакета и благодарница за редовно учество и успешни настапи на фестивалот, односно придонес во одржувањето на традицијата.

„Гоце фест“ се одржува од 1990-та година и до сега има продуцирано над 700 патриотски и родољубиви песни посветени на македонското историско минато и херои. Годинава настапија 19 изведувачи, меѓу кои и Нино Величковски, Круме Спасовски, Серафина Фантаузо, Јулија, Петар Нечовски и др.

Гостиварецот Владо Глигоровски со пеење почнува уште во училишните денови во ОУ „Денче Дејановски“ во Маврово, па продолжува како средношколец преку настапите со ГАКУД „Браќа Ѓиноски“ од Гостивар. Во една прилика е препознат како талент и добива покана од тогашниот уредник и музички продуцент за народна музика Матеја Грујоски да учествува во МРТВ, по што започнува да се развива неговата кариера која трае над 30 години.