Гостиварци низ паркот ќе шетаат по нови патеки

Градскиот парк во Гостивар добива нов лик. Изминатите денови екипи на Јавното претпријатие за паркинг и зеленило работат на уредување на површината на потегот од кај Летниот Амфитеатар до градскиот стадион. Зафатот опфаќа инсталирање на подземен систем за наводнување, изградба на пешачки патеки, раззеленување на просторот и поставување на урбана опрема. „Голем дел од предвиденото веќе е завршено, системот за наводнување е поставен, патеките се при крај, а наскоро ќе бидат монтирани и петнаесетина клупи за одмор“, информира  Мемедали Емро, директор на ЈП за паркинг и зеленило.

Одговорните за јавните зелени површини во Гостивар претходно работеа кај шеталиштето на Кејот на Вардар, каде исто така беше поставено подземно наводнување како и неколку јавни чешми. На тој простор наскоро ќе бидат засадени педесетина нови дрвца.

Доколу работите течат според предвидената динамика, зафатите во градскиот парк целосно ќе бидат завршени кон крајот на месецот. Проценките се дека новиот изглед на паркот и подновувањето на Кејот ќе чинат скоро 100 илјади евра.