Градинките и училиштата во Гостивар повторно ќе се дезинфицираат

Гостиварската локална самоуправа најави дека следната недела повторно ќе спроведе дезинфекција во основните и средни училишта, како и во детските градинки. Оваа превентивна мерка се презема како превенција од ширење на коронавирус, иако Министерството за образование одлучи оваа учебна година да се заврши со онлајн настава, а и не се знае точно кога градинките ќе се отворат за прием на деца.

Градоначалникот Арбен Таравари смета дека учениците сепак треба да се вратат во училиштата и учебната година да се заокружи регуларно.

„Посакувам и се надевам дека учениците ќе се вратат во училишните клупи, барем уште еден месец, да ги компензираат тие недостатоци што ги изгубија изминатите три месеци. Реално голем број на ученици не може и се уште не можат да ја следат наставата онлјан, а Министерството е без стратегија и конкретно чекори во тој поглед. Добро е да се отворат училиштата сега, децата да одат на часови и на тој начин барем да се адаптираат на кој начин ќе се одвива наставата од септември“, изјави градоначалникот.

Во образовните установи и градинките на гостиварска територија претходно еднаш веќе се спроведе темелно чистење и дезинфекција на просториите.