Градоначалникот вети изградба на потпорен ѕид за да се спречи лизгање на земјиште во Речане

Градоначалникот на Гостивар Арбен Таравари при својата посета на Речане, вети дека општината ќе се зафати со решавање на проблемот со лизгање на земјиштето на главниот пат, на влезот на селото.

„На самото место  беше утврдено дека состојбата е алармантна, една куќа е загрозена, а градоначалникот Таравари вети итно решавање на проблемот, односно изградба на потпорен ѕид со што ќе се спречи лизгањето на земјиштето“, информираат од општината.

Градоначалникот во Речане го посетил и селското училиште, каде било утврдено дека се потребни  одредени интервенции за подобрување на условите за учениците и наставниците за спроведување на воспитно-образовниот процес.

„За време на неговата посета на селото Речане, Таравари се сретна и разговараше со локалните жители кои го запознаа со  проблемите со кои се соочуваат селаните и изразија благодарност што раководството на општината изразува подготвеност да помогне во решавањето на нивните проблеми“, се наведува во соопштението од општинската служба за информирање.