Грипот напаѓа – Над 1.200 заразени во Гостивар

Секојдневно расте бројката на заболени граѓани од грип на гостиварското подрачје. Амбулантите се полни со пациенти кои се жалат на висока температура, течење на нос, главоболки, болки во зглобови и општа малаксаност. Симптомите укажуваат на грип, заболување кое вообичаено зема замав во овие месеци.

Гостивар сезонава е на врвот на листата во земјава по заболени од грип. Според податоците од Институтот за јавно здравје, во Гостивар до сега се регистрирани 1.220 пациенти со вирус на грип. Следуваат Тетово со 638 и Куманово со 600 заразени. Според бројот на заболени Гостиват се бележи со „висока активност“ на ширење на грипот.

Во Македонија сезонава вкупно има околу 4.500 грипосани.

Општите мерки за заштита кои ги препорачуваат лекарите се: Да се избегнува собирање и престој во простории каде престојуваат повеќе луѓе, особено да се избегнува близок контакт со луѓе кои се болни, кашлаат, киваат, имаат покачена телесна температура, често да се мијат рацете со вода и сапун или дезинфекциско средство, да се загреваат просториите за престој и често да се проветруваат, потоа топло, но слоевито облекување, топли бањи и да се пијат топли напитоци (чаеви и супи), овошни цедени сокови, вода со лимон.