Грипот зеде две жртви во земјава – Гостивар до сега со околу 650 заболени

Од компликации предизвикани од вирусот на грип во Македонија, изминатите дена починаа две лица. Се работи за петгодишно девојче од Скопје, кое претходно се лекувало во болницата во Козле од воспаление на белите дробови и 24 годишна девојка од Охрид, пациентка со Даунов синдром.

Според податоците од Институтот за јавно здравје, во земјава има задоцнет старт на сезоната на грип, а процентот на позитивни резултати добиени од вирусолошкиот надзор оваа недела од 56% укажува на висока активност на вирусот.

Вкупниот број на заболени е се движи околу 4.500 и повеќето ја поминуваат болеста со полесна клиничка слика, без компликации.

На гостиварското подрачје, сезонава евидентирани се околу 650 пациенти со симптоми на грип и Гостивар е на прво место по бројот на заболени. Сепак, до сега немало хоспитализирани пациенти, сите се лекувале амбулантски и поминувале без сериозни последици.