Гужвите по банките ќе потраат-плаќање сметки во Пошта од 1 март наредна година

Откако Владата даде зелено светло за соработка на Пошта со Халкбанка, граѓаните со право го поставуваат прашањето од кога сметките повторно ќе може да ги плаќаат во експозитурите на поштите без провизија. Истото прашање доаѓа и од пензионерите за исплата на пензиите.

Директорот на Пошта Макрадули денес најави дека тоа би се случило од почетокот на третиот месец, 2021 година.

„Договорот со банката е во финална фаза, постојат детали што ги договараме. Обврска на банката е најдоцна за два месеци да започне со наплата, верувам дека до 1 март следната година граѓаните веќе ќе може да плаќат сметки во Пошта. Замолувам за трпение од граѓаните, нашата провизија што овде се плаќа е најмала.“, изјави директорот на „Македонска пошта“, Јани Макрадули.

По пропаѓањето на Еуростандард банка, со која Пошта имаше договор, граѓаните веќе не можат да ги плаќаат сметките на поштенските шалтери. Тоа, поради провизиите ги чини дополнителни пари од семејниот буџет, а причина е и за поголеми гужви пред останатите банки.