Иницијатива „Стоп Русино“ истрајна во ставот депонијата да се дислоцира!

„Формирањето на регионално претпријатие за управување со отпадот е само можност да се легализира Русино, која ги труе гостиварци. Мора да има дислокација на депонијата“, ова беа дел од заклучоците од состанокот на граѓанската иницијатива „Стоп Русино“ што се одржа вчеравечер во летниот Амфитеатар во Гостивар.

Од иницијативата потврдија дека не отстапуваат од своите барања: Да сопре горењето на Русино, Затворање на Русино и наоѓање решение за отпадот во Русино да не ја загадува понатаму животната средина, Наоѓање нова локација за депонија која ќе се изгради по ЕУ стандарди.

„Нема да дозволиме Русино да стане официјално регионална депонија и тука да се фрла отпад од 9 општини. Дивата депонија Русино е со исполнет капацитет и несоодветна локација и нема логика да стане регионална и да продолжи да не труе. Одлучивме да се оствари средба после изборите со градоначалникот на Гостивар и кој вети дека заедно со нас ќе се заложи да се најде решение за Русино. На средбата ќе бидат повикани и инспекторите за животна средина, кои се должни да го кажат својот став за депонијата. Доколку на средбата не наидеме на поддршка за решавање на проблемот од локалната власт, следните чекори ќе бидат порадикални со протести и блокирање на Русино“, беше речено на состанокот.

фото: Небојша Петревски