Иселување-Околу 200 деца од подрачје на Гостивар се отпишале од училиште по првото полугодие

Трендот на иселување на младите од гостиварскиот регион се потврдува и низ бројките на отпишани ученици. Според податоците од општинскиот Сектор за образование, второто полугодие во училиштата на територијата на Гостивар почна со околу 200 деца помалку во школските клупи.

„Во второто полугодие бројката на ученици во училиштата е намалена за околу 200, а причината за отпишувањето е заминување во странство“, наведуваат од Секторот.

По тринеделниот зимски распуст учениците денес се вратија на настава. Второто полугодие на гостиварското подрачје почна во сите училишта и според надлежните се одвива со вообичаен тек, без проблеми.

„Сите училишта го почнаа второто полугодие подготвено, снабдени се со доволно греење, извршено е чистење и дезинфицирање на просториите. На првиот ден не се регистрирани многу отсуства поради вирусот на грип“, информира раководителката на Секторот за образование, Аслијан Снопче.

Во основните и средни училишта во Гостивар настава посетуваат речиси 10.000 ученици.