Основното јавно обвинителство Гостивар донесе наредба за спроведување истражна постапка против 46-годишен жител на селото Чегране, поради основано сомнение дека сторил кривично дело – Неовластено производство и пуштање во промет наркотични дроги, психотропни супстанции и прекурсори според член 215 став 1 од Кривичниот законик.
„Во текот на месец март, осомничениот од непознато лице набавил наркотична дрога – кокаин и ја препакувал со намера да ја препродава. При претрес во куќата во која живее биле пронајдени 22 помали пакувања кокаин со вкупна нето маса од 10,38 грама. Дрогата била скриена во пластичната цевка за канализација во подрумот на куќата.“, соопшти Обвинителството.
Надлежниот јавен обвинител до судијата на претходна постапка во Основниот суд во Гостивар достави предлог за определување мерка притвор за осомниченото лице. Судот донесе решение со кое на осомничениот му определи мерка куќен притвор.
