Измамник зел 11.000 евра од двајца тетовчани, демек да им отвори фирма во Дубаи

Педесет и седумгодишен жител на тетовско село, вчера (28 март) во 14 часот и 40 минути  во СВР Тетово пријавил дека 58-годишниот М.М. од Република Албанија во текот на минатиот месец нему и на уште едно лице им ветил дека ќе им отвори фирма во Дубаи, а за возврат тие во три наврати му платиле вкупно 11 илјади евра. Но, ниту фирмата им била отворена, ниту парите им ги вратил, по што сфатиле дека се измамени, информира полицијата.

Измамите за вадење документи за работа во странство, дозволи или друг тип на услуги не се ретка појава на полошкото подрачје. Наивни граѓани им плаќаат по неколку илјади евра на измамници, а по извесно време сфаќаат дека всушност се ограбени. Од СВР апелираат на внимателност.

„Апелираме граѓаните особено да внимаваат кога стапуваат во контакт со непознати лица кои им нудат разни услуги или производи и доколку се посомневаат дека се жртви на измамници да пријават на бесплатниот број 192 или во најблиската полициска станица“, нагласува портпаролот на СВР, Марјан Јосифоски.

Годинава на тетовско-гостиварското подрачје евидентирани се петнаесетина измами, од кои повеќето се целосно расветлени, а сторителите се откриени.

Последниот пријавен случај се расчистува и документира.