Каде и како да се фрлаат маски, ракавици, марамчиња од лица во самоизолација и карантин

Министерство за животна средина и просторно планирање објави препораки за управување со отпадот за граѓаните кои се во карантин или самоизолација со сомнителен случај во домот.

Од Министерството посочуваат дека личниот отпад како хартиени марамчиња, крпи за чистење за еднократна употреба, маски или ракавици, се одлагаат безбедно во вреќи за отпад за еднократна употреба. Притоа вреќите наполнети најмногу до 2/3 од нивниот капацитет, треба да бидат спакувани во втора вреќа и убаво затворени, за да бидат безбедни за одлагање во вообичаениот контејнер за отпадоци од домаќинството.

Другиот отпад од домаќинствата се отстранува на вообичаен начин.

Дополнително, од Министерството укажуваат на неопходност од носење заштитна опрема на комуналните работиници, односно сите собирачи на отпад, и применување на претходно изнесената процедура за отстранување на заштитната опрема од страна на сите лица кои ја користат во рамки на своето работење.