Ќе се гради ли катна гаража во Гостивар?

Недостигот од паркинг простор во Гостивар постои години наназад. Постоечките капацитети не се доволни да ги задоволат потребите на граѓаните кои секојдневно користат автомобили. Голем дел од станбените згради немаат свои паркинзи, па граѓаните ги оставаат возилата на улица, а проблемот добива поголема димензија во деновите кога иселениците престојуваат во родниот крај.

Јавното претпријатие за паркинг и зеленило располага со капацитет од околу 650 паркинг места со зонско паркирање и паркиралишта од затворен тип. Но, тие се малку за градот.

„Изградбата на катна гаража ќе го среди проблемот со недостигот од паркинг. Секако тоа е една голема инвестиција, но ние се надеваме, оваа година барем да се започне со изградба. Се разгледува можноста ваков проект да се реализира преку моделот на јавно-приватно партнерство“, вели Музафер Зулбеари, директор на ЈП за паркинзи и зеленило.

Во периодот кога се дојдени печалбарите вообичаено расте и обемот на работа за претпријатието. Нивните пресметки покажуваат дека бројот на СМС пораки преку кои се врши плаќање за зонското паркирање актуелно е зголемен за околу 40%.