Клуч на врата на текстилниот гигант „Тетекс“ Тетово

По речиси 70 години постоење, тетовски „Тетекс“ се затвора. Приказната за текстилниот гигант од Тетово, завршува со клуч на врата.

За околу 150 вработени во фабриката, денешниот беше последен работен ден. Од утре, целосно престанува производството. Според раководството, затворањето на фабриката било неминовно, поради нерентабилноста.

Погонот Конфекција изминативе неколку години работел само за извоз, но состојбите не биле задоволувачки. „Нас текстилците нѐ победи Далечниот Исток со многу ниски цени на текстилот и не можевме да го издржиме тоа“, велат од раководството на фабриката.

За отпуштените работници ќе се примени колективен договор, кој ги опфаќа работничките права за отпремнина и пензионирање.

Тетекс започнал со работа како Волнарски комбинат “Тодор Ципровски-Мерџан”,  на 25 мај 1951 година, со пуштањето во погон на Предилницата за волнена преѓа.