Кога децата раѓаат деца – Загрижувачки податоци за малолетничка бременост

Над 700 малолетнички во изминатите две години (2016 и 2017) во Македонија станале мајки, а 62 прекинале бременост, односно имале абортус. Ова се податоците од истражувањето на Омбудсманот, кои ги презентираше заменик-народниот правобранител Васка Бајрамовска Мустафа. Истражувањето било спроведено во осум здравствени установи во земјава.

„Од вкупно 731 дете кои се породиле во истражуваниот период, четири се на возраст од 11 до13 години, 225 се на возраст од 14 до 16 години, а останатите се породиле со ненавршени 17 години или со ненавршени 18 години. Најголем број малолетни мајки се Ромки, или 405, потоа 162 се Македонки, 109 се Албанки, 43 Турчинки, пет Бошњачки и шест со друго етничко потекло“, рече Бајрамовска Мустафа.

Најголем број од бебињата, вкупно 721 останале со мајката, додека 10 бебиња биле оставени во домот за доенчиња и мали деца во Битола.

Народниот правобранител бара итно да се преземат мерки за справување со проблемот на малолетничка бременост.