Кои категории граѓани и под кои услови ќе може да се движат за време на полициски час

Од утре во Македонија започнува да важи забраната за движење во периодот од 21 до 6 часот. Техничкиот премиер Оливер Спасовски најавувајќи ја мерката полициски час, објасни на кои лица ќе им биде дозволено да се движат и кои процедури и правила треба да ги запазат.

„Од оваа забрана се исклучуваат лица кои имаат потреба од итна медицинска помош, кои се во животозагрозувачка состојба, лица кои одат на дијализа. При тоа тие лица можат да бидат во придружба на најмногу уште двајца. Ако нивното возило биде запрено од полицијата, дополнително ќе се проверува зошто се тие лица излезени и ќе се бара медицинска документација како потврда.“, појасни Спасовски.

Директорите на здравствените установи се задолжуваат да изготват список на вработени лица кои ќе имаат потреба за движење надвор од лимитираното време и да го достават до МВР за да им бидат издадени посебни пропусници и легитимации.Со тоа, МВР ќе има комплетен увид за движењата во овој временски период“, рече Спасовски.

Полицискиот час не важи за припадниците на МВР, Армијата, Противпожарните служби и лицата вработени во Комуналната хигиена кои работат во смена.

Во овој период, ќе се ограничи и бројот на дежурни аптеки, односно ќе се одредат само одреден број аптеки кои ќе дежураат во периодот на забраната.

Такси компаниите се задолжуваат да воведат дежурства со ограничен број возила кои ќе превезуваат до болница или до аптека, а таксистите ќе бидат задолжени да носат заштитна маска и ракавици.

Директорите, управители на погони, фабрики и сите институции ќе треба да го прилагодат работното време, согласно оваа нова мерка.