Комеморација и едноминутно молчење во Гостивар за големиот Радован Павловски

Советот на Општина Гостивар на денешната седница во пригодно сеќавање за ликот и делото му оддаде почит на неодамна починатиот поет и академик, Радован Павловски, кој потекнува од Железна Река, а како средношколце се образувал во Гостивар.

„Академик Радован Павловски е поет, есеист и патописец. Добитник е на наградите „Браќа Миладиновци“ (1965, 2002), „11 Октомври“ (1971), „Кочо Рацин“ (1975), „Повелба на печалбарите“ (1990), „Гоцевата повелба“ (1991), „Ацо Шопов“ за најдобра поетска книга (1995 и 2014), Жезлото на ДПМ (2002) и Благодарница од Струшките вечери на поезијата за унапредување и развој на поетскиот фестивал (2011). Исто така е добитник на странските награди: „Младост“ (југословенска награда за „Суша, свадба и селидби“, (1961), „Златна струна“ (југословенска награда на анонимен конкурс за песната „Железна Река“, 1975) и други. Автор е на бројни книги поезија. Оди кон ѕвездите сега, зашто таму е и местото за тебе – Великану наш.“, рече меѓудругото советничката од ВМРО ДПМНЕ, Анета Ќироска на чиј предлог се одржа комеморацијата за Павловски.

Во негова чест седницата на Советот заврши со едноминутно молчење.