Концерт на ГАКУД „Браќа Ѓиноски“ во Гостивар по повод Денот на независноста на Македонија

Празникот Осми Септември, Денот на независноста во Гостивар се одбележа со неколку настани, меѓу кои и концерт на народни ора и песни на Градското аматерско културно-уметничко друштво „Браќа Ѓиноски“. Концертот се одржа во Летниот Амфитеатар, каде пред публиката се претставија фолклорната секција на друштвото, оркерстарот и неколку солисти.

„Пред се‘, дозволете ми на вас и на сите граѓани и граѓанки на Македонија да ви честитам самостојна суверена и независна Македонија. Ова беа првите зборови кои што беа изговорени од страна на тогашниот прв претседател на Македонија, Киро Глигоров, со кој што и конечно стана вистина оној вековен сон на сите нас Македонците уште од втори август  1903. Исцртувајќи ги контурите 1944 на АСНОМ конечно на третиот Илинден односно на 08 септември, Македонија доби сопствена самостојност. Уште од Крушевскиот манифест постојано се проткајува една нитка на заедништво и инклузија која што до ден денес сите ние ја негуваме и взаемно ја надградуваме. Денес, може да кажеме дека најголема победа за Македонија е тоа дека сите граѓани без оглед на нивната верска и етничка припадност ќе ја чувствуваат Македонија како нивна единствена татковина. Програмата којашто ја подготвивме е еден скромен начин да го одбележиме овој голем ден за нас. Сакаме да ви се заблагодариме што дојдовте во толкав голем број што особено не‘ радува, а исто така што голем дел од публиката е млада која го вреднува и почитува целото наше македонско постоење.“, беше речено во воведниот дел на настанот.

Како соло изведувачи на концертот настапија: Јовица Николоски, Мирослав Крстески и Ѓурѓица Николоска.